Unn hier noch die Kolumne vom Taxi-Schorsch
Sösche, da simmer widdä – un zwar in de Bundeslischa Nummero uno. Un des gar net mal so schlecht, wemmer ma die zwoode Halbzeit gesche die Pilledreher un des Schbiel gesche die Herdda dezent vergesse. Abrobbo Herdda, wie unsä Buwe da nachm Kick gefeiert worn sin, da hat unsä (Noch) Bundeskanzler ganz neidisch geguggt.
Komme mer zu unsere Neuzugäng un zu dem Argument, dass die Schweizä zu langsam sin. Leut, isch bitt eusch: N schnelle Schweizer – des is so was wien grundanschdännische Oxxebacher – so was gibt’s net – und kommt mir jetzt net mim Ruedi Elsener, der hatt sischerlisch en Süddeutsche Vadder oddä so was gehabt. Er waases bloß net.
Neulisch kam ach endlisch mei Dauerkadd – de klaane schinesische Adler Addi – La hattse persönlisch vorbei gebracht, sonst hätts noch bis Weihnachde gedauert. Was solls, des is im Grund alles Schnee von morsche, schließlich wird’s ned so heiß gekocht, wies gegesse werd.
Rischdisch Glasse is ja aach de Ergebnisdienst im Hochsischerheidsdraggt: Erst kimmtn laude „Wuuuuusch“ – un dann „BILD brässendierd ...“ – Na subbä, hiä Fraport, die Waldvernischder uffem Driggo, da die Commäzbank, unsän Garant fier Hartz IV als Namenspadron fiers Meenzer Uefa-Kapp-Schdadion un dann ach noch die BILD (Nix geht iwwä die Wahrheit). So musses sein, immä schee aan uff Anderstätment un dadefier symbadische Werbedräscher mit menschlichem Antlitz. Da wisse mer genau, was mer so gärn habbe. Isch waas ja net: alsemal denkisch: des aanzisch launische bei unsärär Diva bin isch. Un unsän Schdroh-Engel. Wassen jetzt, isser Schdroh – odään Engel? Oddä gar n Schdrohengel? Lusdisch, demnächst heiradet unsän Frommer noch die Frau Laus – un dann hammern Schdroh-Engel undn Frommer Nico Laus im Schdurm. Na fro’s Fest.
Falls der Herr Veit von der Eff Enn Pee hier widdä mitliest: Glaab bloos ned, isch hädd net gesehe, wie in dere Zeidung neulisch son hessische Babbler sein Kommendar abgegewwe hat – s näxde Mal hätt isch gärn en scheene Gruß annen Taxi-Schorsch! Sonst schreibisch n Leserbrief, der sich wasche tut. Un des sach isch ihne ach verbal, gell.
Achja, de Lexa kam ja gesche Nürnbersch in de neunzischst Minut ins Schbiel – zumindest konditionell hadder gut mitgehalde, däätisch mal sache.
A la, gehabt eusch wohl – und denkt dran: Wenn's denkst, ist eh zu spät.